薩莫拿+1舔脷

猪拉多纳

明尼路夠分出線hea踢

今晚同聽朝上演多場南美自由盃分組賽煞科戰，其實有啲球隊未踢呢輪已經出線，當中包括上屆盟主明尼路，呢支巴西勁旅於第4組尾輪主場迎戰FC薩莫拿，主W熱到冇肉食，後者和波亦有可能出局，點會唔趁明尼路戰意鬆懈下搶分呢？今仗FC薩莫拿仲有得受讓，阿King認為讓球客勝捧得過。

（周五凌晨4時30分開賽）

首先講吓第4組形勢，明尼路依家有9分位列榜首，由於佢哋領先第2嘅FC薩莫拿兩分之餘，同時領先聖達菲及國民會4分，因此佢哋已穩奪出線資格。相反FC薩莫拿只係多聖達菲及國民會兩分，後兩者今輪正面交鋒，若果分出勝負而FC薩莫拿只能打和，便會出現同分計得失球嘅情況，到時都幾惡搞；為免夜長夢多，FC薩莫拿最好係擊敗明尼路。由於巴甲未開咧，明尼路明顯未操起，不但近三仗全數打和，上輪作客哥倫比亞球隊聖達菲成場被圍攻，無論控球、射門、角球等數據都輸晒，能夠1比1全身而退真係執番身彩，嗰仗有隨隊嘅「細哨」朗拿甸奴，最終連後備名單都冇份，如今已篤定出線，隨時繼續畀細哨抖吓。

FC薩莫拿於聯賽踢到如火如荼，近八場各項賽事贏咗六仗，更怒轟二十球，狀態弗爆，加上今仗贏波就肯定晉級，必定趁明尼路hea踢拚盡爭勝。最離譜係明尼路唔單止要讓波，主W熱到得番1.22倍，純粹係名牌效應，FC薩莫拿有得受讓，阿King建議冷敲有3.45倍嘅讓球客勝。
國民會聖達菲大火併

至於同組國民會主場對聖達菲，如果今場打和就會齊齊出局，估計雙方都搶攻求勝，入球大乃不二之選。最後第8組彭拿路主場對安索阿迪古，由於雙方已經出局，欠缺爭勝動力之下，唔慌多波入，轉玩細盤好過。