基AC「讓主」引新水喉落疊

猪拉多纳

AC米蘭鹹魚翻生，上仗擊敗熱拿亞，今季首次聯賽3連勝。原因係太子女芭芭拉近期四出搵財團入主，球隊為吸引新水喉有好日子過，球員梗係搏命啦。AC今晚意甲聯賽主場對包尾嘅卡坦尼亞，更加係製造大勝粉飾太平嘅好時機，必定全力進攻，一於直取讓球主勝。

（TVB 301周一凌晨2時45分直播）

芭芭拉早前去過中東、亞洲等地，希望搵到富豪入股，令球會有財力增兵。不過要換條大水喉，首先球隊必須取得佳績，先至有議價能力。AC眾將士亦都好配合，大踢身價波，巴洛迪利、卡卡以至本田圭佑近期輪流發威。事實上如果球會莫財冇錢買人，實力減弱甚至任人魚肉，球員比賽都好冇癮啦，現實啲隨時仲要減人工，難怪AC班兵近期咁落力。

教練施多夫講明餘下目標係打入前5位，取得下屆歐霸盃席位，雖然只係「二奶盃」，但講到尾有得踢歐洲賽，點都吃香啲，有助芭芭拉向潛在買家推銷，相信AC會衝埋季尾呢段以達到目標。
卡坦尼亞作客未叻過

卡坦尼亞積弱多時，近8場輸足7場，想護級都有心無力。佢哋最大死穴係作客極差，今季16場聯賽作客竟然只得2和14負，狂失35球，可以話係完全冇反擊之力。即使首循環主場鬥AC，都以1比3敗陣，今仗去到聖西路球場，淨輸兩球或以上好合理。