PSG讓得狠有道「里」

猪拉多纳

今晚法甲將會由2支分別喺周中歐洲賽出局嘅球隊對碰，里昂主場惡鬥巴黎聖日耳門（PSG），呢場波同時亦係雙方喺下星期舉行嘅法國聯賽盃決賽前哨戰。考慮到里昂近況甚差而且傷兵唔少，得番地利一味好難同PSG抗衡，雖然PSG今場讓半一，2.12倍依然上盤抵玩。

（TVB302周一凌晨3:00直播）
里昂近7戰得2勝

PSG喺歐聯8強被車路士淘汰，但其實賽事形勢唔算一面倒，球隊喺最尾關頭失守明顯欠缺經驗所致。論人腳，PSG肯定比里昂優勝，就算射手伊巴謙莫域返咗去瑞典養傷，但前線都仲有另一星級前鋒卡雲尼掛帥，配合能傳擅射嘅拿維斯、盧卡斯洛迪古斯，火力依然有保證。事實上佢哋想喺聯賽提早封王只差一步之遙，今晚肯定唔會放軟手腳。

里昂喺周中歐霸盃次回合輸畀祖雲達斯後，同樣喺8強止步，但比PSG少一日休息時間。而且佢哋狀態麻麻，近7戰錄得2勝5負，中場哥古夫、加連尼亞、守將米基爾盧比斯等人又未復出，球隊傷疲問題嚴重，主場4連敗並唔係咩天方夜譚。