李斯特城不速之「客」

猪拉多纳

雷丁主場啞火傷兵多

今晚英冠上演獨腳戲，由雷丁主場恭候李斯特城。主隊嘅升班附加賽資格未穩陣，客軍就已經篤定重返英超，表面睇好似雷丁鬥心強啲，不過佢哋唔止前線啞火同中場傷兵成籮，仲要騎呢到「主弱客強」，照咁睇，今場都係揀作客讓平半嘅李斯特城上盤穩陣。

（TVB302周二凌晨3:07直播）

現時排喺第8位嘅雷丁，除咗卡拉簡十字韌帶受傷一早收咧之外，古費利、丹尼爾威廉斯、麥奇利及賀比阿克班幾位中場亦全部打柴，成條中場線殘破不堪，嚴重影響攻守實力，雖然防守中場利格活久休復出，並喺上輪後備落場，但狀態明顯唔夠，根本幫唔到咩手。
「狐狸」篤定升班主帥嗌球員咪揸流攤

最怪雞嘅係雷丁「主弱客強」，踏入2014年後9場作客聯賽贏咗6場，頻頻搶分成功，相反主場就冇優勢可言，喺2月開始6戰3和3負未贏過，當中所入嘅3球波，1粒靠對手烏龍球送禮，其餘2粒由箭頭普格恩耶克射入12碼，進攻火力弱成咁，點信得過呀？

雖則李斯特城喺鎖定重返英超後，緊接嗰場聯賽就以1:4大敗畀白禮頓，令連續21場聯賽不敗走勢告終，但佢哋仍然要為聯賽錦標努力，「狐狸」主帥皮雅臣喺日前向球員發出「溫馨提示」：「希望球員享受餘下賽程，而非『派對時間』，我哋需要保持專注咁完成球季。」皮雅臣講到咁白，怕且紐根特、菲臘斯同安迪京治等中前場主將都唔敢揸流攤啩！
雷丁旺開半場和

雷丁近6仗有5次開半場和。

李斯特城連開3口入球大。

雙方近6次交手有4次開半場細。
李城冇包袱「大」無畏

雷丁要鞏固升班附加賽資格，今仗肯定焗攻博3分，不過中場孖寶古費利同丹尼爾威廉斯都受傷缺陣，唔多唔少削弱防守力，撞正篤定重返英超兼冇晒心理包袱嘅李斯特城，當然要捧1.78倍大啦！