恒大征澳辣盤顯信心

猪拉多纳

亞冠盃近年成為東亞球隊天下，競爭味道大減，為保持賽事吸引力，兼避免得失西亞市場，賽會今屆決定改制，將東、西亞球隊分開，直到決賽先會碰頭。呢個明顯係出於商業考量，對於部分實力強勁嘅東亞球隊嚟講係冇咁公平，但玩得呢個遊戲就要遵守遊戲規則，真係冇得揀。

今次揀場亞冠盃G組賽事研究，中國名牌球隊廣州恒大（馬會譯名：FC廣州）作客澳洲火併墨爾本勝利，捧客隊！恒大今季踢落好似冇咁銳利，有人歸咎於幕後人縮皮減獎金，查實佢哋冇咗個主將孔卡，點都要時間調整，唔可以預期班波咁快就回復無敵狀態。大軍今次仲缺少主將迪亞文迪及郜林等人，但作客都要讓到半一，個盤硬淨到不得了，反映普遍莊家仍然對呢隊波勁有信心，上盤值得一試！

（now 670周二下午5時30分直播）
阿仙奴靠決心扑「錘」

同日英超有場補賽阿仙奴主場對韋斯咸，「兵工廠」周末盃賽鬥韋根讓到一球以上，臨場大戶出擊連買幾轉下盤，睇死阿仙奴贏唔到，結果佢哋真係要搏到射12碼先贏，睇得好準。「兵工廠」近況確係唔算好，不過佢哋依家喺聯賽爭前四形勢被動，已經再冇失分空間，歐聯席位真係好重要，大軍決心遠勝排11位踢風流波嘅「錘仔幫」，今場只要發揮正常，相信可以贏波贏盤。

（now 621周三凌晨2時45分直播）