拜仁半場大起凱沙

猪拉多纳

叉足電衝今季第3冠

今晚德國盃4強拜仁慕尼黑獅子搏兔，主場對乙組仔凱沙羅頓！衞冕嘅拜仁剛於聯賽Hea踢吞死敵多蒙特3蛋，堂堂「宇宙最強」輸得咁肉酸都幾冇面。不過，教練哥迪奧拿講明留力爭盃賽，拍晒心口一定要打入德國盃決賽奪冠。今仗必下令球隊省番靚金漆招牌，大炒凱沙羅頓重振聲威。相信拜仁上半場贏兩粒，應會冇問題，建議博1.75倍半場大。

（無綫翡翠台周四凌晨2時30分直播）

拜仁提早奪得德甲冠軍後，球員演出的確有所鬆懈，連續3場聯賽贏唔到，拜仁咁做法其實亦好正路，始終餘下聯賽係例行公事，無謂再搏，慳番啖氣全力衞冕歐聯同爭德國盃好過。

事實上，哥迪奧拿不嬲想超越前主帥軒歷基斯上季為拜仁創造嘅三冠王戰績，依家世冠盃及德甲已經到手，換言之，攞埋歐聯及德國盃，拜仁就可完成四冠美夢，所以今仗就算對住「乙組仔」，哥帥必定派強陣出擊，全力打沉凱沙羅頓。

預料今晚哥迪奧拿會用番文迪蘇傑攻堅，呢位克羅地亞國腳喺歐聯８強兩戰曼聯都有出色演出，由於多蒙特射手羅拔利雲度夫斯基下季來投，文迪蘇傑喺餘下賽事更加要大顯身價，務求得到哥帥歡心力保位置，鬥乙組仔都唔會留手。
凱軍作客拜仁10連敗

凱沙羅頓爭升番上甲組機會唔大，近況亦都麻麻，近4仗只得1勝，能夠打入德國盃4強已算係超額完成，相信佢哋唔敢奢望可以淘汰拜仁。睇番凱沙羅頓過去10次作客拜仁，錄得全敗收場，包括上屆德國盃第2圈就吞4蛋，更何況拜仁今季實力更上一層樓，試問凱沙羅頓點招架得住。