鐵桶黑貓強細鍊車

猪拉多纳

守和曼城照辦煮碗

英超殺到入大直路，爭標分子車路士今晚提早出擊，喺史丹福橋球場恭候新特蘭，齋計牌面就梗係冇得打啦，不過「藍戰士」有歐聯後顧，會唔會去到盡真係好難講。既然「黑貓」連踢兩場好波士氣大振，上場和曼城個鐵桶陣又咁使得，今鋪實行照辦煮碗頂埋佢，就算輸都唔會輸得太肉酸，入球細有成2.45倍抵捧。

（now621台周日凌晨0:30直播）
車仔留力歐聯副選孭飛

由於車路士躋身歐聯4強，英超賽會為遷就「藍戰士」終於做番件好事，將今場波由原定嘅聽晚推前一日舉行，雖然話有多1日休息時間備戰周三凌晨造訪馬體會場歐聯4強首回合大戰，但以車路士領隊莫連奴嘅性格，今仗點都會收起部分主力，派遣穆罕默德沙拿同費蘭度托利斯等副選兵落場。

有留意開車路士嘅朋友，都睇得出自從夏薩特受傷後，球隊嘅進攻明顯冇咁銳利。就講上場聯賽吖，即使開波15分鐘多啲就人多蝦人少，「藍戰士」始終咬極唔入，要去到成70分鐘先攻破史雲斯防線贏得1粒，今晚佢哋繼續有夏薩特缺陣，橫睇掂睇都唔似會炒得起新特蘭。

要護級搶分嘅球隊特別惡，新特蘭就係好例子，呢隻包艇「黑貓」前仗僅輸畀愛華頓0:1已經贏盡掌聲，周四凌晨更加憑穩守突擊賽和曼城2:2，如果唔係門將文路尼犯錯畀「藍月亮」扳平，3分落晒袋啦！呢場波曼城係就係冇咗耶耶托尼，但班鋒將對住新特蘭嘅鐵血防線明顯冇碇埋手，「黑貓」下下回防都起碼有7、8件球員圍喺禁區，既然呢招鐵桶陣咁Work，領隊普耶去到史丹福橋肯定Encore。
新特蘭死守戰術有料到

呢位昔日烏拉圭名將賽前表示，喺曼城身上搶到分令球員信心大增，又強調即使球隊護級失敗都唔會離隊，依家陣營士氣不知幾好，要佢哋撕破今季英超主場僅失9球嘅車路士防線係難，但以球隊家陣嘅氣勢，相信就算輸都係頂龍一球起兩球止。
乜都玩錦囊：車仔慢熱捧埋「半細」

新特蘭去到史丹福橋，相信會照辦煮碗，好似上仗造訪曼城咁打穩守突擊，車路士表現一向慢熱，好多時都係下半場先嚟料，以「藍戰士」連開3仗半場細嘅走勢嚟睇，1.62倍半場細梗要追捧啦！
Data King：新特蘭半場死火

‧新特蘭近8仗半場只有1球進帳。

‧連同歐聯賽事，車路士近7仗主場賽事贏晒。

‧車路士連續6場英超主場不失。