馬體會球員洋溢「奪冠」情緒

猪拉多纳

馬德里體育會今季演出令人眼前一亮，甚至可以用「嚇親」來形容，通常一支球隊見到奪冠機會來臨，自然就識踢，而且會愈踢愈順，心理上肯定佔優。呢方面亦係車路士輸蝕嘅地方，皆因上仗英超輸畀包尾新特蘭，打窒道氣，加上球隊整體狀態麻麻，首回合馬體會主場小讓平半，細鬼捧上盤。
狀態未弗 照樣上力

馬體會季初表現唔算起眼，但勝在一直保持良好狀態，不斷創造驚喜，聯賽贏皇馬、歐聯淘汰巴塞，充分證明球隊係真材實料。細鬼做過球員，好清楚球員心理，有時好奇怪，當覺得奪標機會即將來臨，就自自然然會上力。就算狀態未係巔峰，一樣可以有好表現，呢種情況好難解釋，但的確存在，或者係平時所講嘅順境波。馬體會正處於呢種階段，佢哋一路都踢得好順，冇理由依家先至嚴重失準。

至於車路士其實唔算曳，細鬼都好鍾意佢哋，無奈近期喺英超頻頻碰壁，輸畀兩支弱隊水晶宮同新特蘭，認真洩氣。高手過招，雙方之間即使差少少，往往就係勝負關鍵所在，論近況及狀態車仔的確稍處下風。馬體會讓平半，上盤超低水，盤口已反映主隊佔先機。