少帥施蒙尼神乎其技

猪拉多纳

踏入4月尾，歐洲各大聯賽冠軍將會陸續揭盅，當中以西甲、英超爭逐最為激烈，利物浦登上英超盟主寶座機會應該高唱入雲，但馬德里體育會要問鼎西甲冠軍，仍屬未知之數。馬體會今晚歐聯4強首回合主場對車路士，焦點必定係雙方有料主帥施蒙尼同莫連奴場邊大鬥法。
3年打造歐洲一線勁旅

車仔領隊莫連奴過去十年已證明自己係世界頂級名帥，施蒙尼屬於後起之秀，佢僅用三年時間，就將馬體會打造成歐洲一線勁旅，亦屬難能可貴，甚至可以用神乎其技來形容。馬體會8強兩戰巴塞，都係率先主攻，獲得領先優勢後，轉踢穩守突擊。

Peter作為教練，都好想睇下呢位阿根廷少帥今場有乜新部署鬥「車」，其他教練從中觀察，亦會有所得益。

車仔歐聯經驗豐富，但狀態麻麻，上圈次回合驚險贏巴黎聖日耳門晉級，以及早前聯賽小勝史雲斯，都係靠丹巴巴亞蠻力入波，呢招難維持長久，而上仗聯賽就輸埋畀新特蘭。

事實上，首回合對決，估計兩隊會以防守為主，總之以唔畀對方入波為前提，似會係一場少入球嘅和波賽事。
金句：各師各法，均用「守」法