諾在其中：夠信心老馬無保留

不死鸟

韋達停賽，結果造就咗柏寶成為大贏家，唔單只喺韋達停賽期間接手咗一啲韋達嘅坐騎，仲要連場數胡，前個賽日已經大演帽子戲法連中三元，上周六賽日騎足十場，所騎嘅馬餐士面唔錯，結果贏夠四場畀大家睇，先後憑「好心情」、「實在好」、「武士神駒」同「競駿精英」揚威沙田馬場，後駒上仗就喺韋達胯下贏馬，今場唔等韋達復出，擺明車馬出擊，亦都益咗柏寶。喺韋達停賽期間柏寶前後已經贏咗八場頭馬咁多，相信下個賽日柏寶一定食住呢個勢，贏多幾場頭馬，順便為嚟緊遠征新加坡新航短途錦標壯一壯行色。

超勝未出頭必拼

　　禮拜三照例谷中跑夜馬，四班一千米嗰場，小妹鍾意匹「超勝」，呢匹馬今季跑過多仗，近兩仗已經喺谷草一千米入位，前仗以半個馬位僅僅輸畀隻大熱門「跑得叻」，上場跑同程又以四分三馬位僅敗，追唔到由頭放到尾嘅「盈驥」，兩場跑得近但都係差些少未出頭，台前幕後一定好鬥志，今場跑C+3欄，排內檔有着數，屆時抽到好檔就係成功嘅開始。

　　另一場四班一六五○米賽事，小妹支持「夠信心」，呢匹馬已經七歲，季內由三班落番嚟四班，上兩仗用梁家俊減磅果然有幫助，都能夠跑入位置，前仗跑田草千四米，只喺輸條馬頸，差啲爆出四十二倍大冷W﹔上仗跑谷草一六五○米，快放到尾段只係輸半個馬位得季軍，後晚再戰同程要負重磅，如果用個十磅仔減吓磅又有爭勝本錢，難得七歲老馬狀態仲咁弗，當然要睇好。