西班牙內訌大鬥火力

猪拉多纳

另一場歐霸４強首回合上演西班牙內訌，西維爾坐鎮主場火併「蝙蝠兵團」華倫西亞。其實大家熟晒路冇秘密可言，定必在首回合搶攻先發制人，況且今仗係兩大歐霸射手加美路同柏高艾卡沙正面交鋒，大鬥射術勢必多波入，斯維建議捧大盤。

（有線62及202台周五凌晨3時05分直播）
華倫防線殘缺鬥攻好過

西維爾近6次主場對華倫錄得5勝1和，首回合先有地利梗會搶攻喇。西維爾前鋒加美路以5球成為球隊歐霸首席射手，加埋中場核心拿傑迪錫弗到爆，火力全開都咪話唔得人驚，況且佢哋喺16強曾同貝迪斯打咗兩場激烈嘅塞維利亞打吡，同國內訌經驗豐富。

華倫西亞喺聯賽冇嘢好爭，依家疊埋心水打歐霸，上圈首回合落後3球嘅劣勢下，次回合竟大炒巴素利5蛋奇迹大逆轉，該仗連中三元嘅新星柏高艾卡沙亦乘勢崛起，佢喺歐霸嘅入波仲多過聯賽，暫以7球位列歐霸射手榜次席，只係比已出局嘅薩爾斯堡前鋒祖拿芬少1粒。可惜「蝙蝠兵團」有門將迪亞高艾維斯及守將列卡度哥斯達、域陀雷斯、辛德路斯因傷倦勤，只能用馬菲奧及查維富亞高繼續串演中堅，橫掂後防點排都唔穩陣，教練比斯隨時以攻代守，一於博攞作客入球，預計雙方會合演入球騷，大盤有1.8倍咪嫌少。