禾堡重現狼相誓踢歐聯

猪拉多纳

德甲禾夫斯堡主場鬥弗賴堡，禾堡經過09年首度稱雄德甲後已沉淪四季，今季喺有料經理K阿羅夫斯同務實教頭赫基領導下終於重現狼相，誓要搶得下屆歐聯參賽資格，今晚主場迎戰踢風流波嘅弗賴堡，贏面高唱入雲，主Ｗ係過關重心，單頭可以捧埋2.1倍讓球主勝。

禾堡外號「北方狼」，不過多年來喺德國球壇碌碌無為，未攞過重要錦標，自2001年大眾汽車（福士）入主成為大股東後，開始財大氣粗，直至09年終於初奪德甲冠軍，當時教頭馬加夫成為功臣，所以當佢喺11年冇得撈後，禾堡重新畀佢手執大權，不過禾堡09年奪冠嘅真正功臣其實係「前線神奇三叉戟」迪斯高、加菲迪同米斯莫域，馬加夫重掌帥印似乎志在掠水多過教波，喺短短年半間買賣咗逾70名球員，大部分貴買平賣，大大虛耗禾堡資金，但未能複製奪冠輝煌，搞到禾堡近四季都無法再獲歐洲賽資格。
弗賴堡殘陣壓力減

好在，大眾汽車給予禾堡強力支持，球隊今季又搵到優秀管理人才，終於再現狼相，現時排第五位，只落後利華古遜一分，尚餘三輪賽事，碰巧利華今晚要硬撼勁旅多蒙特，禾堡主場面對質次一皮，兼且護級已鬆一口氣嘅弗賴堡，相信唔會錯過搶佔前四機會，球會近期已積極為下季增兵，包括以400萬歐元年薪利誘漢諾威嘅前曼聯鋒將馬美迪奧夫加盟，野心十足。加上弗賴堡今仗中後場兩大主力奧利華蘇治同菲歷斯卡拉奧斯停賽，黑柴相信禾堡大勝可期。
有線64及203台周六晚9時30分直播