皇馬速決大起奧沙

猪拉多纳

皇家馬德里剛喺周中歐聯4強首回合主場一球小勝拜仁慕尼黑，球隊現時士氣如虹，加上下周中要作客拜仁，相信今仗主場對奧沙辛拿會速戰速決，務求以最快速度解決對手，養精蓄銳進行次回合賽事。皇馬今仗要喺上半場入2球相信並非難事，一於捧「半場大」。

皇馬上周冇進行聯賽，球隊喺歐聯四強首回合擊敗拜仁取得3連勝，基斯坦奴朗拿度（C朗）帶傷上陣但表現不俗，賽後更表示已冇大礙，加上之前感冒纏身嘅加里夫巴利亦有後備上陣，證明身體狀況已回復正常，有望今仗聯賽復任正選。皇馬嚟緊下周中將要作客拜仁踢次回合賽事，球隊自然希望速戰速決盡快解決對手，讓一眾球員有多啲時間休息應付對拜仁嘅賽事。

奧沙辛拿上仗聯賽主場1比1打和華倫西亞，近4場聯賽保持不敗，不過球隊今仗有中場羅拔圖托利斯及法蘭斯高施華停賽無法上陣，令球隊實力大減。而且奧沙辛拿作客強隊例腳軟，遇上希望盡快鎖定勝局的皇馬，上半場隨時已經輸夠兩球，今仗一於捧半場大。
now 632周日凌晨2時直播