傑帥第1擊紅魔入波騷助興

猪拉多纳

霸氣重現糟質「金絲雀」

「傑帥」首演，霸氣紅魔開「大」片！隨住莫耶斯黯然離場，効力曼聯24年嘅傑斯暫時接掌帥印。傑斯領軍能力係點仍然係未知數，但可以肯定佢比莫帥更令班球員信服，小妹相信曼聯今場會踢出呢半年嚟罕見嘅霸氣，加埋受易帥消息刺激嘅主場球迷助威，入波肯定唔會少！不過要護級嘅諾域治亦唔好惹，上仗「發窮惡」圍攻利物浦證明佢哋有力反擊，1.52倍入球大咪錯過！

（now621台周日凌晨0:30直播）

曼聯炒莫耶斯嘅手法雖然惹嚟唔少爭議，就連費格遜都開聲表示不滿，不過對曼聯球迷同班球員嚟講，唔理點炒，炒咗就天下太平喇！講真吖，小妹覺得以曼聯班球星嘅質素，根本冇可能踢出咁差嘅成績，睇番朗尼、菲爾鍾斯等喺莫帥走人後就大開「高爾夫派對」，就知班友仔唔妥莫帥好耐喇！
球星信服封傑斯做「大佬」

紅魔依家由領軍零經驗嘅老大哥傑斯帶隊，就連施丹都話應該畀佢坐正添！小妹唔敢講佢哋嘅戰績會唔會即刻大反彈，但傑斯尋日首次以曼聯領隊身份出席賽前記招時，自爆畀班「曳豬」球員喺更衣室個位寫上「大佬」，就知將帥關係唔錯。加埋呢位老臣子多年嚟幫紅魔攞過咁多錦標，斷估班球星都會畀番幾分薄面佢，搏盡踢番場好波啩！

傑斯賽前唔止向大軍講明「非常信任你哋嘅能力」，又落「柯打」叫佢哋「盡力入波、攔截」，相信朗尼、桑馬達同「脫苦海」嘅香川真司會踢出應有實力，按近2次主場鬥諾域治最少入4粒嘅慣例省番幾球。
諾域治有火入到波

4連敗嘅諾域治近況雖然惡劣，不過護級球隊季尾可以有幾惡，連環令曼城同車路士失分嘅新特蘭係最佳例證。小妹記得諾域治上仗主場鬥利物浦失兩粒後即時發難，幾乎成功喺紅軍身上搶分，其中表現最出色嘅，當數兩位進攻中場辛迪加斯同列特文，由佢兩哋發動嘅連串攻勢令「金絲雀」整個下半場都圍住紅軍嚟攻，如果今晚對曼聯可以用番呢股鬥志去踢，絕對有能力入波，做番場入球騷o架。
Data King：諾域治半場冇料到

‧諾域治連續4戰半場冇入波兼落後。

‧曼聯近5次喺主場迎戰諾域治全部贏波，其中4場至少攻入兩球。

‧兩軍近6次喺奧脫福交手，有4次開入球大。
乜都玩錦囊：紅魔士氣波「讓主」捧得過

受到換帥因素刺激，可以預期曼聯今場一定大踢士氣波，雖然要搶分嘅諾域治隨時「發窮惡」，但以紅魔球員嘅質素，回復番正常發揮嘅話冇理由搞唔掂「金絲雀」，1.8倍「讓主」值得推介。