皇馬「讓主」十拿九穩

猪拉多纳

西甲進入最後直路，皇馬暫時落後榜首嘅馬體會6分，但係少踢一場，想保住爭標希望，今晚喺主場迎戰奧沙辛拿實在不容有失。「銀河艦隊」最近連贏巴塞隆拿同拜仁慕尼黑兩大勁旅，氣勢勁到爆燈，要贏護級分子奧沙辛拿邊有難度？一於追多次皇馬「讓球主勝」。

（now632台周日凌晨2:00直播）
賓施馬膝傷休戰

皇馬周中歐聯對拜仁有C朗復任正選，結果憑賓施馬一箭定江山，首回合領先1:0，雖然佢哋幾日後又要作客慕尼黑，但出名硬淨嘅C朗肯定上陣，實行當係大戰熱身，配合埋狀態甚佳嘅巴利同迪馬利亞，火力一樣強勁。即使中堅比比有輕傷，賓施馬又膝傷唔踢得，可能由小將華拉尼頂替，但問題都唔大，以皇馬近期凌厲走勢，今場大炒都唔奇。
奧沙辛拿火力弱

奧沙辛拿暫時以35分排15位，只係比尾3嘅基達菲多3分，球隊今季防守力其差，失咗成54球咁多，其中作客魯營試過大敗0:7，今晚對面C朗等高質球星，好難保到清白之身喎。特別係前線火力疲弱，聯賽平均一場都入唔到一球，今仗去到巴拿貝球場難逃大敗！