火熱水晶困曼城

猪拉多纳

5連勝攻得銳守得穩

英超富豪球會曼城爭標處於被動狀態，今輪作客對住風流球隊水晶宮牌面唔難踢，但水晶宮喺有料教頭佩尼斯帶領下廿二年來首次喺頂級聯賽取得五連勝，呢支風流波下場會鬥利物浦，直接左右爭標大局，家陣佢哋班兵個個狀態箭嘴向上，曼城就算有中場重心耶耶托尼復出都難言穩勝，冷敲2.95倍讓球主勝！

（now 622周日晚11時10分直播）

曼城去到爭標最後直路表現反覆，早前於爭標關鍵六分波不敵利物浦並非致命傷，最大鑊係翌仗主場鬥新特蘭失兩分，依家打少場落後一哥「紅軍」六分，已失爭冠主導權。曼城射手尼格度同進攻中場拿斯尼賽前都話未放棄爭標，不過，若然利物浦喺今場開波前除去最大障礙車路士，恐怕曼城都係無望翻盤，到時隨時踢到患得患失。
實幹佩尼斯教到曉飛

查實曼城今場本身都唔易踢，水晶宮季尾五連勝踢到曉飛，喺實幹型教頭佩尼斯調教下，班波攻守都好對辦，近期最令人印象深刻係主場殺敗車路士，守到對方一戙都冇，另一場代表作係作客擊敗愛華頓，反擊效率極高，前線進攻主力賓捷安近四戰入四球順到不得了，大軍護級成功後保持銳氣，依家冇晒壓力之下，有力再打老虎！
曼城殘陣耶耶缺態

曼城中場大腦大衞施華、快翼捷西斯拿華斯及中堅拿斯達錫都要養傷，前兩者缺陣令球隊攻力受削，消息指球隊中場重心耶耶托尼有望趕及復出，但狀態肯定不足，面對水晶宮逼搶踢法肯定有排捱。水晶宮中場迪加蓋爾及前鋒查馬克傷勢無大礙，人齊出擊有得揮，佢哋下輪會鬥利物浦，但今次有機會先幫「紅軍」攔住另一爭標分子，受讓博得過！
領隊Chit Chat

佩尼斯（水晶宮領隊）：我會盡力派最強人腳，因為我哋有責任向其他球隊交代，希望班兵唔會鬆懈，呢場大波係佢哋表現自己嘅好機會。

比歷連尼（曼城領隊） ：我預期所有球隊都會派出最強陣容爭勝，唔會因為有後顧而留力，無論機會大定細，我永遠都會以勝利為目標！