聯賽爭標冇保留馬體會捉「蝙蝠」

猪拉多纳

力爭18年嚟首個聯賽錦標嘅馬體會今晚作客「蝙蝠兵團」華倫西亞，只要佢哋贏埋剩低嗰4場西甲其中3場就可以封王，難怪教練施蒙尼同球員都話將歐聯擺埋一邊，專心踢好今場波先。既然咁有決心，就算佢哋要讓半一，今仗照撐2.05倍上盤。

（now632台周日晚11:00直播）

馬體會暫時以4分同6分壓住巴塞同踢少場嘅皇馬排榜首，爭標形勢佔主動。雖然佢哋有鬥車路士嘅歐聯後顧之憂，但教練施蒙尼講明先專心應付聯賽，中場荷西蘇沙亦幫口話成班人抖咗5日經已叉足電，做好準備迎接聯賽9連勝。同時佢亦提醒隊友繼續保持專注，相信表現唔會走樣得去邊。
華倫後防天殘地缺

預計呢位中場今晚會聯同韋拿、堤亞高文迪斯同傷愈復出嘅阿達杜倫落場，另一名中場基比亦要喺歐聯4強次回合停賽，今仗極可能上陣搏殺，陣容算係完整。睇番「床單兵團」今季5次出戰歐聯淘汰賽之前都贏波壯行色，今次對住近況麻麻嘅華倫冇有怕！

華倫近8戰僅2勝，證明冇足夠能力應付聯賽同歐霸盃兩條戰線。加上今戰防線有列卡度哥斯達、辛德路斯、域陀雷斯、門將迪亞高艾維斯打柴，佢哋連續5次喺歐霸盃前嘅西甲又全部失分，今戰唔似有分落袋。