獅吼勝利駁火做「大」騷

猪拉多纳

澳職常規賽冠軍布里斯班獅吼，今日會喺季後賽4強迎戰墨爾本勝利。雖然獅吼今季成功踢出悅目足球，不過佢哋經過十幾日無比賽嘅「真空期」後，狀態反而令人懷疑，冒險博佢哋贏波，倒不如玩1.62倍「入球大」仲划算！

（有線64周日下午3:00直播）
貝利沙爭入波「騷哥利」

獅吼由於喺首圈輪空，所以足足有兩個星期冇正式比賽，球員狀態可唔可以維持確實好難講，幸好佢哋個王牌前鋒貝利沙可以趁機醫好傷勢，呢位下季將高價過檔墨爾本勝利嘅射手，今場對住未來東家當然要「騷哥利」，盛傳獅吼正力斟前德國國腳漢基取代佢嘅位置，相信獅吼班攻擊球員亦會搏命爭取表現，唔愁入唔到波。

墨爾本勝利近期硬仗連場愈戰愈勇，早前喺亞冠盃2:0勇挫廣州恒大，更被澳職聯賽主席形容為「澳職球隊歷來最精彩一仗」。雖然勝利最終都喺亞冠盃出局，但咁樣反而增強佢哋爭澳職冠軍嘅決心，前鋒艾奇湯臣同古希美近期士哥頻頻，有力同獅吼駁火做「大」騷！
頂占筍盤：布里斯班獅吼（入球大）