開餐擦私房菜 阿仙奴食「素」

猪拉多纳

今晚英超獨腳戲，阿仙奴會迎戰紐卡素，眼見歐聯入場券競爭對手愛華頓喺前晚玩「自爆」，兩度擺烏龍輸波跌晒3分，阿仙奴今輪坐鎮酋長球場出戰，梗係趁機贏波拉開優勢，喺奧斯爾同艾朗藍斯聯袂組織攻勢下，要大擦「喜鵲私房菜」話咁易，兵工廠「-1」揀1.63倍「讓主」啱數！

（now621台周二凌晨3:00直播）

據網站《傷病聯賽》數據統計分析，阿仙奴一如既往成為「容易受傷的廠仔」，係目前為止受傷兵問題影響最深嘅英超隊伍，當中以艾朗藍斯缺陣影響最大，分析指如果「死神」健健康康嘅話，「兵工廠」贏波率將大幅提高18%，家陣仲有得同利物浦拗手瓜爭標咁話。
紐記近4次對賽輸晒

無論信唔信數據都好，艾朗藍斯嘅重要性的確毋庸置疑，由佢月初傷愈復出開始，直到上場作客侯城踢足全場交出1入球1助攻，完全擔起球隊進攻命脈。至於喺上月中歐聯受傷嘅奧斯爾，上輪擔正復出踢咗半場多啲，雖則冇「死神」演出咁醒神，但佢哋喺前場合作組織串連，絕對係致勝關鍵。今場繼續有呢對孖寶鋪橋搭路，加埋連續兩場梅開二度嘅普多斯基孭飛數胡，火力夠晒保證。

至於喺聯賽中游冇嘢好爭嘅紐卡素，近4度硬撼阿仙奴輸晒不特止，近10次聯賽作客阿記亦輸咗8場，簡直就係阿仙奴嘅「私房菜」，任(目及)唔嬲。

更何況「喜鵲」4大箭頭冇支鋒利，柏比斯施斯上場打柴提前收咧，盧克迪莊冬季加盟後仲未開齋，艾美奧比踢到季尾至入得嗰1球，受傷抖咗段時間嘅首席射手雷米，雖則喺上仗後備復出搏殺，但明顯未重拾比賽狀態。誇張啲講句，今晚真係想偷雞破蛋都冇本錢。
Data King：阿紐戰近5次碰頭全開半和

‧雙方最近4次對壘，阿仙奴取得全勝。

‧雙方近5次碰頭全部開出「半場和」。

‧紐卡素近10次英超作客阿仙奴僅得1勝，其餘成績為1和8負。