利是來用韋達W

猪拉多纳

　　韋達近期神勇，贏馬機器終於撻番，站在馬迷的角度，定想看到彼此認真積極去應對每一場賽事，這樣無論輸或贏，至少心甘命抵！另一邊廂，剛戰莫雷拉和潘頓齊齊食白果，當然能否贏到馬是一回事，但看過他倆的演出我完全唔覺得有問題，尤其潘頓冇運到簡直離晒譜，最慘大部份坐騎是後上馬，唔係蝕步速就受阻，輸晒形勢，所以縱使無馬贏，但在有誠意和拼勁下落敗，我無話可說。其實之前都講過，我信有三衰六旺，明白好多時也有可能出現如潘頓剛周日般這麼欠運，但又是否長期處於弱勢？我有保留，再者運氣看似虛無飄渺，但某程度上，也是自己累積得來，機會人人都有，但我更認同的是，機會是留給有準備的人呢！

　　今次介紹第二場柏寶輸開的「利是來」，總之有跟開此馬的，也完全體會到又前又後的跑法，上場咬牙切齒，卻不知為何直路力弱，這可能正是剛才所講的，手風運氣是自己積回來吧，今次夠換上韋達，明刀明槍要交代！第三場再追柏寶的「多綵」，老實講，真是純粹信馬，轉投容後進度一切正常，無疑是匹難贏馬，但近仗演出，又受阻又留得太後，再唔係就走當日不利場地，我唔服氣，輸得唔真實，再追！廖浩賢