宇宙最強勢殲銀河艦隊

猪拉多纳

拜仁皇馬安聯球場星戰

歐聯4強次回合「星戰對決」，「宇宙最強」拜仁慕尼黑在安聯主場迎戰「銀河艦隊」皇家馬德里，皇馬首回合主場令人信服地贏1比0先拔頭籌，今晚進可攻，退可守，理論上只要攞到作客入球，進身決賽機會絕對在拜仁之上，不過黑柴堅信「外星仁」平均戰鬥力在皇馬之上，回師主場可以重現真正威力，最低限度可以贏番一場，甚至有能力反勝晉級，拜仁讓半一，捧上盤。

講番首回合，拜仁控球佔有絕對優勢下攻極都唔入肉，反而畀皇馬反擊搞到險象環生，上半場只落後一球絕對夠運，不過拜仁下半場中段以後亦有扳平良機，皇馬保住勝果亦要感謝門將卡斯拿斯嘅神救，不過以整場比賽表現，皇馬攞到首回合領先優勢相當合理。拜仁教頭哥迪奧拿嘅Tiki-Taka賽後遭受名譽會長碧根鮑華狠批，國王列貝利演出亦畀名宿簡尼鬧爆，但事實上，黑柴認為最大問題唔喺哥帥戰術身上，拜仁該役大部分球員都踢唔到本身水準，尤其整條防線演出都喺水準以下，今晚返到主場，哥迪奧拿會重新用番4231陣式，查維馬天尼斯復出同舒韋恩史迪加拍住任雙防中，中場會硬淨番好多，隊長拿姆回歸右閘代替上仗表現失色嘅拿菲爾，進攻中場用湯馬士梅拿代替卻奧斯，陣式比首回合更見平均。

皇馬有一球在手，球隊信心爆棚，C朗仲聲言唔會再次錯過歐聯決賽，相比起首回合陣容，教練安察洛堤只準備作出一個變動，傷愈嘅加里夫巴利會代替艾斯高，不過陣容唔係一貫嘅433而係442，巴利仔會放喺左中場位置，參與更多防守工作，明顯係針對拜仁飛翼洛賓嘅安排。不過皇馬作客德國要保持不敗難度甚高，佢哋今屆8強戰作客西法倫球場就曾經輸過0比2畀多蒙特，球隊歷史上9次作客拜仁1和8負未贏過，近兩次到訪安聯球場分別係07同12年，兩次都係輸1比2。
拜仁次回合翻盤機率高

拜仁喺歐聯征戰史上，喺兩回合淘汰賽階段曾經試過6次首回合作客先輸0比1，結果次回合返到主場全部都可以贏波，其中5次仲反敗為勝過關，只有90年對AC米蘭贏2比1，最終因為作客入球優惠條例出局，今晚面對實力相當嘅皇馬，能否翻盤殺入決賽要打過至知，但贏番一場機會甚高，對於皇馬嚟講，今場最重要係爭取作客入球，當然唔介意輸多次1比2啦！
歐聯密碼

05:拜仁過去6次於兩回合淘汰賽首回合輸0比1，有5次可以反勝晉級

09:拜仁過去9次主場對皇馬未輸過，取得8勝1和佳績

21:拜仁對上21次對西甲球隊只曾1敗，其餘20戰15勝5和

23:皇馬對上23場歐洲作客賽事輸過5場，有4次係輸畀德甲球隊，包括最近一次喺上圈8強輸畀多蒙特。