韋根搶分大鬧伯明翰

猪拉多纳

英冠嚟到尾聲，榜尾兩支難兄難弟伊奧維同班士利鐵定降班，依家就睇下剩番邊隊逃唔過死神嘅魔爪，排尾三嘅伯明翰就最有機會，「阿伯」將喺主場對韋根，唔好以為佢哋主場可以睇高一線，呢隊波係英冠奇葩，主場成績仲衰過作客，防守尤其得人驚，今場對手仲要係力保升班附加賽資格嘅韋根，大盤可期。

（周三凌晨2時45分開賽）

伯明翰喺季中嗰陣仲未有降班威脅，點知踏入3月就一瀉千里，最近仲錄得4連敗，搞到跌落降班區，阿伯一向有前冇後，攻力唔差但防守就勁曳。呢隊波另一特色係有個「地獄主場」，唔係嚇到客隊腳軟嘅凶地，而係整衰自己嘅「地獄」！

佢哋作客成績排第8，但22場主場賽事只係贏得2場，輸咗成12場，喺聯賽榜包尾，真係激到班主場球迷嘔血咁滯！伯明翰今場對手韋根依家畀排第7嘅白禮頓追到氣咳，今場再唔贏就好大鑊，為奪附加賽入場券採取主攻就預咗，不過韋根作客防守唔算好強，今場捧大盤啱數。
屈福特等放假益查爾頓

另一場就有同樣要護級嘅查爾頓主場對屈福特，屈福特餘下賽事屬例行公事，唔會同主隊搏命，查爾頓上盤可一試。最後講埋英甲卡維尼主場對卡素爾，卡素爾要為護級而戰，要焗攻對手，反而畀卡維尼有反擊機會，大盤唔怕追。