衝勁寶轉場有圖謀

不死鸟

明晚八場谷草賽事，採用Ｃ加三欄Ｃ加六彎作賽，上次用呢條跑道作賽係四月八日嘅谷草賽事，當晚差唔多全部頭馬都係由放頭或守好位嘅馬取得，而一檔馬更勝出其中兩場。所以，今次筆者選馬都係以放頭或內檔馬作為首選，尤其係千二米賽事，馬匹出閘冇耐就要轉彎，檔位因素更為重要，吼實內檔馬應該冇錯。

        第四場四班千二米，「永勝馬」在港四戰只跑獲第六至十名，表面睇戰績一般，但上仗後曾經由杜利萊親自試大閘，反映幕後有搏殺之心，今仗除咗抽到一檔起步極為有利之外，沈集成安排呢隻馬初戴眼罩上陣，估計亦對此駒有頗大幫助。今次「永勝馬」繼續用杜利萊操刀，同場對手實力未算太強，隨時有機會一網打盡。

        第六場三班千二米，「衝勁寶」對上四仗合共取得兩亞一季，證明八歲馬仲有兩腳。上仗出爭千四米大敗而回，賽後潘頓解釋坐騎響早段搶口，對其催策欠反應，而李易達就話呢隻馬陣上一度不願展步，先至會大敗而回。賽後「衝勁寶」操練由頭做起，上月尾響楊明綸胯下試泥地一○五○米閘，輕鬆壓倒「得運寶」掄元，反映健康絕冇問題。

        今次李易達安排「衝勁寶」轉場出擊，跑番曾獲兩冠兩亞一季嘅谷草千二米，擺明志不在小，值得捧場。