畢爾包「大」舉進攻

猪拉多纳

贏即穩袋歐聯入場券

西甲今晚有場獨腳戲，由華歷簡奴主場恭候畢爾包，客軍今鋪只要全取3分，就可以鎖定來屆歐聯入場券，事隔16年再次踏足歐聯大舞台，預期作客都肯定鬥心十足，撞啱華歷簡奴無欲無求，相信兩軍肯定放開懷抱咁踢，1.59倍入球大捧得過。

（開賽時間：周六凌晨3:00）

畢爾包畀亨格比利嘅感覺不嬲都有型有格，皆因呢支巴斯克球隊只會用番巴斯克人，今季佢哋終於修成正果，暫時喺西甲累積65分排第4位，拋甩第5位嘅西維爾6分，今晚贏波即可鎖定來屆歐聯參賽資格，試問戰意又點會唔旺盛吖？
華歷簡奴冇包袱放開嚟踢

畢爾包守將古柏治繼續倦勤，不過佢哋以攻代守一樣掂，今季已經有16球聯賽「士哥」嘅阿度里斯，踏入季尾愈踢愈有，近4仗就有5個入球，由佢夥拍蒙尼恩同安達靴里拉合組攻擊鐵三角，邊使慌冇波入。

主場出擊嘅華歷簡奴冇嘢好爭，降班又唔輪到佢哋，踢落自然冇乜包袱，呢個亦係佢哋近5場全部開大兼喪入11球嘅主因。球隊近4仗錄得3勝1和佳績，教練占美斯話今季餘下目標係盡量搶分，務求力爭上游，聽佢咁講，似乎想同畢爾包鬥攻喎，入球大梗係要捧啦！