正氣愛華頓截劫曼城

猪拉多纳

主場硬淨 馬帥拍心口打真軍

愛華頓上月喺希爾斯堡慘劇廿五周年同死敵利物浦齊心進行悼念活動，實現利市大融和，「拖肥糖」今輪主場迎擊「紅軍」爭標大敵曼城，仲有機會做埋利物浦救星添！佢哋由93年至今主場鬥曼城只曾一敗，呢次有力做攔路虎，受讓半一，下盤有1.88倍，絕對捧得過！

（now 621周日凌晨零時30分直播）

英超爭標形勢喺上周出現變化，利物浦不敵車路士，曼城砌低水晶宮後追到打少場落後一哥「紅軍」三分，球差仲贏住八粒，形勢唔錯。曼城今輪面對利物浦死敵愛華頓，賽前陰謀論滿天飛，有人認為「拖肥糖」難望爭入前四，實會讓路畀曼城，粉碎「紅軍」冠軍夢，不過，愛華頓不嬲正氣，教頭馬天尼斯亦講明會喺本季主場煞科戰為球迷而戰，實在唔好有太多無謂揣測。
曼城訪凶地讓波高危

愛華頓最令人擔心係中路防守不穩 ，上輪鬥修咸頓兩大正選中堅迪斯甸同菲臘積基爾卡齊齊養傷，要用新仔史東斯同雪到硬晒嘅艾卡拉斯扼守中路，結果後者開波僅一分鐘就擺烏龍孭晒鑊，難以予人信心，好在防線重心菲臘積基爾卡有望復出，相信情況會有改善。而中場巴利係曼城借將冇得倒戈，箭頭米拿拉斯就要養傷，戰鬥力係要打折扣，但喺主場出擊仍然好硬淨。

曼城中場核心耶耶托尼已傷愈復出，上場踢到曉飛貢獻士哥及助攻各一，兩個西班牙進攻球員捷西斯拿華斯及大衞施華傷勢無大礙，但預期會先任後備。曼城贏埋今場可暫時霸住一哥位置，但佢哋始終係要追分嗰隊，若然去到中後段和緊或者落後，真係好難冷靜爭取士哥，最大鑊係球隊93年至今十五次作客葛迪遜公園贏得一場咁大把，勝出率低至不足7%，仲點學人讓波啊？
3雄餘下賽程：1.利物浦（80分）

5月6日 作客 Vs 水晶宮

5月11日 主場 Vs 紐卡素
2.車路士（78分）

5月4日 主場 Vs 諾域治

5月11日 作客 Vs 卡迪夫城
3.曼城（77分）

5月4日 作客 Vs 愛華頓

5月8日 主場 Vs 阿士東維拉

5月11日 主場 Vs 韋斯咸