富咸救亡死拚破城

猪拉多纳

富咸護級正處於水深火熱中，今晚作客對史篤城相信會繼續主動搶攻爭取勝利；相反史篤城早已「上岸」，一眾球員現時處於放假心態，今仗未必會全力以赴，富咸作客有力搶分而回，捧讓球客勝。

（now 622周六晚10時直播）

富咸上仗主場面對侯城，一度領先2比0下最終被對手逼和2比2實在非常不值，主帥馬加夫該仗喺下半場換入迪查加及基蘭李察臣後，令球隊進攻變得非常流暢，更成功取得兩個入球。可惜，富咸最終被侯城一個幸運入球及走甩對手前鋒沙恩朗之下，由贏變和痛失兩分，但由此可見球隊入球能力其實不錯，只要後防集中精神，今仗就算作客都可以有分落袋。
史篤城「上岸」冇目標

史篤城主場一向夠惡，強如車路士及阿仙奴聯賽作客皆要俯首稱臣。不過，史篤城喺聯賽已經「上岸」，球員近幾仗似乎冇晒目標，上仗不敵熱刺更有隊長梳爾哥斯紅牌被逐今仗停賽，面對誓必搶分護級嘅富咸未必能發揮主場威力，富咸今仗作客有力全身而退，捧讓球客勝。