賓帥希古恩勢助拿玻里捧盃

猪拉多纳

今晚意大利盃決賽將於中立場羅馬奧林匹高球場上演，費倫天拿大戰拿玻里，又係「盃賽專家」賓尼迪斯表演時間，呢位西班牙籍教練曾經協助華倫西亞、利物浦、國際米蘭、車路士贏得盃賽冠軍，今季執教拿玻里，即打入意盃決賽，果然好有盃賽運。加上射手希古恩及時傷愈，實在係天助拿玻里，正所謂好波不如好運，一於簡單要1.57倍拿玻里「冠軍」。

賓尼迪斯執教華倫西亞期間，除咗兩奪西甲冠軍，亦捧過歐洲足協盃（歐霸盃），轉投利物浦，贏得歐聯同足總盃，其中05年歐聯決賽落後AC米蘭3球，都可以扳平，仲射贏12碼捧盃，堪稱奇迹。短暫執教國際米蘭同車路士，都分別有世冠盃及歐霸盃落袋，真係唔到你唔服，睇來意大利盃又係佢嘅囊中物。

事實上，拿玻里今季整體表現及人腳質素都喺費倫天拿之上，賽前仲收到好消息，首席射手希古恩已經傷愈復操，可望改善近期偏弱嘅鋒線力量。加上拿玻里下屆歐聯外圍賽席位已經好穩陣，可全力搏殺。
意盃決賽可勝費倫天拿

反觀，費倫天拿有大勇嘅翼鋒古達度停賽，呢位哥倫比亞國腳近4仗攻入4球，佢缺陣之下，肯定大大削弱球隊入波本錢。加上馬里奧高美斯養傷，基奧斯比羅斯剛傷愈冇耐缺態，恐怕難以威脅拿玻里大門。無論「天命」或客觀條件，拿玻里都佔優，捧盃十拿九穩。
now633及660周日凌晨3時直播