巴塞同心悼維蘭路華

猪拉多纳

與啱啱殺入歐聯決賽嘅馬德里雙雄相比，剩番聯賽可爭嘅巴塞可謂冇晒飛士，今晚西甲早場「地上最強」將坐鎮主場對尾四嘅基達菲，佢哋仲會穿上紀念因癌症去世嘅前任教頭維蘭路華嘅波衫，哀兵作戰唔講得笑，適逢基達菲傷停成籮，想搶分亦有心無力，不妨直取讓球主勝。

巴塞今季跌入低谷，眼見首都雙雄皇馬及馬體會將合演歐聯史上首次同市打吡之餘，聯賽又畀榜首馬體會以4分騎住，落後佢哋兩分嘅三哥皇馬有打少一場優勢，只剩三輪比賽，巴塞爭標形勢處於下風。不過「地上最強」已經無路可退，必定先做好本分贏波，寄望兩大勁敵失分，好似上仗作客維拉利爾，原本踢到渾渾噩噩先失兩球諗住死梗，點知「黃色潛水艇」忽然發波瘟兩擺烏龍得以反勝，以慰剛去世嘅前任教頭維蘭路華在天之靈。
着「Tito，永遠」波衫鬥基達菲

巴塞連續兩場喺王牌美斯有士哥兼上演大逆轉，睇嚟啲信心同好運開始返緊嚟喎。為咗紀念維蘭路華，巴塞今仗仲會着住印有「Tito，per sempre etern」（Tito，永遠）字句嘅波衫，賽前亦會播放維帥嘅精華片段及進行1分鐘默哀儀式，勢必激起巴塞眾將爭勝決心。雖然基達菲上仗勇挫馬拉加，令護級重現曙光，可惜今仗有馬利卡、柏度李安及拉法盧比斯等主力停賽，門將莫亞亦因傷上陣成疑，攻守實力大削，況且佢哋近6次對巴塞輸晒狂失25粒，見親「地上最強」都腳仔軟，去到魯營球場都係等炒格，讓球主客和巴塞讓兩球照捧讓球主勝。
now 632周六晚10時直播