大行情終於回勇

猪拉多纳

　　如果冇記錯，上期田草都係有兩場盃賽，又係1場本地、1場國際，以為大賽日熱門會好啲，點知當天只贏到兩場；今日又有兩場級際賽舉行，會唔會各場熱門危危乎？我唔敢咁大口氣批死，不過，季末漸近，大賽日大家睇路嘞。

　　第三場四班1200米。「勁酒王」之前我已經提供過，可惜至今未贏過，實力肯定冇原本預期咁好，注定成世在中班打滾。不過，唔叻還唔叻，上次算係近期水準之作，畀佢放到入第三，唔係「人強馬勁」後勁太強，應該有Q腳。

　　睇嚟老蔡諗通咗，知道呢匹馬點跑最好，呢次用蔡仔，放馬實唔使擔心，若果放得有尺寸，帶到有咩出奇。

　　第七場三班1200米。「大行情」季初贏得「信眼光」和「龍華太旨」，嗰兩隻之後經常在三班跑得好，反而佢自己未有運行，真係冇乜天理。

　　不過，上次終於跑番好啲，再唔似得早前兩場咁，輸到母雷公咁遠，應該係回起嘅前奏，呢場成績會更進一步。

　　第十場三班1400米。「包裝鬥士」上次贏得唔係容易，冇數到潘頓最後直路一共打咗幾多鞭，肯定就冇停過手，如果稍一不慎，可能已經畀「名駒」擒埋，既然贏得咁險，再出應該唔好沾手。

　　包裝鬥士搏到盡

　　但我又唔係咁睇，依家孫達志可謂粒粒皆辛苦，贏得唔贏咩！仲邊有本錢收埋收埋吖，所以，安排新勝馬再跑食胡路程，「包裝鬥士」一定會搏到盡。(陳華棟 資深評馬人)