施蒙尼將「蔗渣變燒鵝」

猪拉多纳

經過刺激嘅兩回合準決賽，兩個歐聯決賽席位亦名花有主，由皇馬大戰馬體會，唔單只係西班牙雙雄內訌，亦係歐聯史上首次上演同城打吡。皇馬坐擁C朗、加里夫巴利等天價球星，主帥安察洛堤又因時制宜主打反擊，能夠力克拜仁唔出奇。馬體會就以蔗渣嘅價錢，踢出燒鵝嘅味道，全賴紅褲子出身嘅教頭施蒙尼領導有方，呢名前阿根廷國腳懂得睇餸食飯，其麾下嘅迪亞高哥斯達、佐治高基、高甸等質素唔算超班，但個個實而不華，施帥利用全場壓迫打法激發球員嘅潛力，將「床單兵團」打造成一支攻守平衡嘅鐵血之師，喺淘汰賽先後殺敗AC米蘭、巴塞隆拿及車路士，絕對唔講得笑，連「寸王」莫連奴都寫個服字畀佢。其實大家叫車仔領隊莫連奴係「寸王」唔多公道，因為莫帥贏波認叻係有料，但輸波佢亦會好有風度咁讚對方。
祖記拜仁「衰」國內贏晒

不過Peter都想畀個建議莫帥，盡快收番借畀馬體會嘅門將泰拔高圖爾斯，一來呢位身高手長、反應敏捷嘅門神實在太弗，二來年逾30嘅車仔鋼門施治傷患漸多，後備龍門舒華沙更四張幾靠唔住，倒不如重用正值當打嘅泰拔高圖爾斯。至於祖雲達斯意外地喺歐霸4強被賓菲加淘汰，難道意甲水準跌Watt得咁嚴重？Peter認為祖記同拜仁一樣，喺國內聯賽獨大太容易贏波，轉踢水平更高嘅歐洲賽時，無論狀態定心態，好難即刻撻着副偈。至於賓菲加嘅決賽對手西維爾，主帥艾美利喺限米煮限飯下，甚至一度有力衝擊來屆歐聯入場券，如今有得爭歐霸委實難能可貴。無論如何，今屆歐聯同歐霸冠軍將被伊比利亞半島球隊擸晒，真係威過威士忌。
金句：一個城市，一個半島，一支歐聯、歐霸冠軍！