馬體會「讓客」搶韁

猪拉多纳

利雲特踢風流波走晒樣

西甲「一哥」馬德里體育會今晚會作客鬥利雲特，主隊基本上夠分上岸，冇咩降班壓力之餘又冇嘢可以爭，今仗大有機會繼續踢風流波。相反馬體會只要喺剩低嗰3場聯賽攞到6分即可宣布封王，齋睇作戰心態贏咗一大截。加上「床單軍團」喺周中歐聯4強作客反勝車路士躋身決賽後士氣大振，呢個1.63倍「讓球客勝」真係有買趁早。

（now632台周日晚11:00直播）

未計今輪聯賽之前，西甲得番3輪賽事，利雲特分別領先排18、19位嘅艾美利亞同華拉度列9分同10分，雖然後者打少場，數字上仲有得追過利雲特，不過機會有幾多大家心照。難怪呢班波最近表現走晒樣，近9仗錄得1勝3和5負，夾埋仲要入得5球咁大把，風流波味濃。
利雲特5鬥3強失17球

既然利雲特班球員個心已經提早放假，今晚仲點喺西甲失波最少嘅馬體會身上搶分先？而且佢哋對住強隊例必腳軟，今季喺聯賽5鬥馬體會、皇馬、巴塞一共失咗成17球，場均失成3球有多，好難做到攔路虎喎！

馬體會喺聯賽煞科戰要作客惡戰巴塞，為免夜長夢多，主帥施蒙尼梗係想喺煞科戰前鎖定冠軍。雖然佢哋作客車仔後體力未必咁快回復至百分百，但「床單軍團」喺聯賽同歐聯都叫緊胡，單憑戰意足夠克服體能問題。箭頭迪亞高哥斯達嚟到季尾仍然保持穩定嘅入球數字，配合好波之人阿達杜倫，前線火力確有保證。另外一對中堅高甸同祖奧米蘭達近期喺死球上前助攻亦有斬獲，相信「床單軍團」今晚要贏兩球唔難！