恒大四大神鋒勢破櫻花

猪拉多纳

亞冠16強首回合爆發中日「古城對決」，由上屆盟主中超嘅廣州恒大（足智彩譯：FC廣州），出征古名「浪速」嘅大阪惡鬥櫻花。恒大四大攻擊手艾傑臣、郜林、穆里奇與迪亞文迪愈來愈夾，乘住櫻花近況麻麻，勢必「乘鋒破浪」先拔頭籌，小讓平半冇有怕。

（now 671周二晚6時直播）

恒大官方日前發布今次中日大戰嘅海報，充滿古代氣息，特別標示古名楚庭（廣州）與浪速（大阪）中日兩座古城對決，主題為「乘鋒破浪」，浪係代表櫻花，最特別之處係個「鋒」字由9、29、11、23四個數字組成，也是恒大四位進攻主力艾傑臣（9號）、郜林（29號）、穆里奇（11號）及迪亞文迪（23號）嘅波衫冧巴，意指靠晒呢四位神鋒攻陷來自浪速嘅櫻花。
穆里奇做Keyman一流

自從阿根廷外援孔卡離隊後，代替佢嘅迪亞文迪更擅踢影子前鋒及右翼，但恒大嘅進攻組織總係唔多暢順；不過納比不愧為世界級名帥，「銀狐」將穆里奇墮後一格打攻擊中場，以佢擅於盤球突破嘅優點，及與隊友郜林、艾傑臣默契十足，成隊波即刻生晒，前線更具殺傷力，連艾傑臣都話若果冇穆里奇穿針引線，球隊進攻猶如一盤散沙，難怪恒大喺聯賽七連勝。

相反，櫻花雖然剛於日職反勝名古屋鯨魚，打破六場聯賽不勝嘅困局，但演出只屬一般，烏拉圭射手科蘭與年輕前鋒柿谷曜一朗經常各自為戰，並且連續九場有失波，防線唔多穩陣，難與啱啱喺納比第100場領軍贏波嘅恒大相提並論，加上櫻花已經近四次主場出擊未嘗一勝，有地利都冇用，恒大小讓平半兼低水擺明有計，上盤非常值博。