男人們的世界盃

猪拉多纳

前幾日睇咗一篇森美大哥嘅專欄，佢話「男人需要搵個肯同自己出汗嘅女人」，令我好有共鳴，相信係好多男人心聲。不過今年令更多男人有共鳴嘅，應該係搵個肯陪男朋友或者畀男朋友睇世界盃嘅女人！

世界盃6月又嚟啦，今年又係日夜顛倒嘅一屆，我肯定會有好多人都迷迷糊糊咁返工，甚至好多女朋友埋怨點解你要早咗瞓覺，點解你為咗世界盃早起身，不過叫你陪我行街，半個鐘就話腳軟…世界盃喎！四年一屆，係唔少男人嘅浪漫，可以同班兄弟一齊睇波，又或者自己早睡早起都要睇一場英格蘭，呢樣嘢我諗淨係男人至會明白。各位女朋友、老婆，就畀你男朋友放一個月假啦！世界盃對於佢哋嚟講，可能同考DSE冇分別，都係咁緊張、好睇、緊湊，就畀佢哋癲一次啦！
對英格蘭有情意結

每次世界盃都話英格蘭奪標指數有幾高，不過到頭來次次都陰溝裏翻船！雖然係咁，不過我仍然好期待英格蘭入決賽，情意結嘛！雖然巴西有主場之利，不過絕對不能睇小德國，西班牙，我甚至會覺得比利時有機會殺入四強，日本絕對有能力更上一層樓，就睇下今屆嘅賽事可唔可以有新嘅四強組合出現，英格蘭，比利時，日本同巴西！