皇馬兵疲吼半場細

猪拉多纳

華拉度列鐵桶陣搶分護級

「銀河艦隊」被重重圍困難起航！皇家馬德里今晚喺西甲補賽作客弱旅華拉度列，前者明顯喺歐聯搏得太盡未回到氣，上仗大意失分未能進一步追近榜首馬德里體育會，華拉度列仍要搶分護級，但佢哋攻力太過疲弱，必定擺出鐵桶陣迎敵，實搞到「銀河艦隊」老鼠拉龜冇碇埋手，初段唔慌多波入，半場細有1.78倍值得捧場。

（now 632周四凌晨3時直播）

上周中歐聯4強次回合皇馬作客清風送爽贈拜仁四蛋，雖然霸氣盡現，但班波明顯太過搏命未回得切氣，日前喺聯賽主場對住華倫西亞，幾經辛苦先靠王牌C朗施展虎尾腳扳平搶番一分，未能乘住一哥馬體會輸波拉近多啲距離，依家皇馬少踢一場下差同市死敵五分，爭標勢危。該仗皇馬有中場核心莫迪歷因小腿受傷避戰，另一中場迪馬利亞太攰先任後備，令轉守為攻嘅速度減慢，主帥安察洛堤起用新仔伊拿拉文迪又頻頻斷纜，就算莫迪歷今仗趕及復出，但匆匆出戰狀態未必托弗。
華軍主場頂得兩嘴

華拉度列現時排緊尾二，護級形勢水深火熱，上仗主場一球險勝愛斯賓奴，無疑增強咗球員嘅信心，不過華拉度列今季首席射手查維亞古艾拿自三月中後未有進帳，前曼聯前鋒文路祖喺聯賽只入三粒，季中仲放走埋最具創造力嘅德國中場艾拔，難怪佢哋之前七仗聯賽入得四球咁大把喇。好彩華軍防線尚算硬淨，近五仗聯賽有四場保持清白之身，頂得兩嘴，今仗梗係穩字行先，希望守得一分得一分，其實該隊主場迎戰巴塞、馬體會、華倫西亞、維拉利爾等勁旅僅失兩球，全部上半場均冇乜交收，預計對住皇馬會繼續擺鐵桶陣，「銀河艦隊」初段未必咬得入佢哋，半場細有1.78倍咪嫌少。