打比郡火力猛下盤送大「禮」

猪拉多纳

經過漫長球季，打比郡、昆士柏流浪、韋根同白禮頓呢4支英冠球隊終於攞到升班附加賽入場券。今晚打頭陣嘅4強首回合賽事，由喺聯賽煞科戰搭上附加賽尾班車嘅白禮頓主場迎戰「三哥」打比郡。睇番打比郡今季成功「雙殺」對手，而且火力冠絕英冠，今仗竟然受讓平半，呢個1.73倍下盤梗係要支持。

（TVB301周五凌晨2:45直播）

升上英超同掘到個金礦其實冇咩分別，據英國傳媒估計，今屆升上英超嗰隊幸運兒下季至少袋1億鎊（約13億港元）落袋，咁點到球會唔緊張先？
聯賽雙殺白禮頓前線三叉戟煞食

白禮頓喺煞科戰憑住射手荷西烏路亞喺補時階段入波全取3分，壓過雷丁升上第6位取得附加賽資格。係就係值得開心，不過班波搏到咁盡未必回得切氣喎。難為領隊奧斯卡仲話主動出擊砌低對手，報回聯賽「雙殺」之仇，咁樣隨時貪勝不知輸被人反擊得手。

既然打比郡「雙殺」得白禮頓，證明佢哋係有能力食住對手，成班球員落到場心理上點都着數啲。而且球隊前線「三叉戟」基斯馬田、莊尼羅素同白賴臣上仗休息，佢哋今季夾埋一共轟入45粒，比部分英冠球隊嘅入球數字仲要多，打比郡養精蓄銳下想喺個心雄晒嘅白禮頓身上偷雞入波，都唔係咁難啫！