昆士柏質高唔怕韋根

猪拉多纳

今晚英冠升班附加賽將上演另一場4強首回合賽事，由韋根主場鬥昆士柏流浪。呢兩支前英超球隊上季齊齊降落英冠後力求極速升班，今次交手肯定有睇頭。睇番人腳同狀態，客軍QPR肯定佔優，今仗受讓平半值博，一於揀1.96倍下盤。

（TVB302及廣東體育周六凌晨2:45直播）

韋根多年嚟都鍾意喺季尾先發力衝刺，所以被本地球迷戲稱為「英超小強」。但自從上季季尾失靈慘遭降班後，今季都用唔番呢個「必殺技」。球隊近11戰僅得3勝，最尾4仗更輸足3場，差啲保唔住個附加賽資格，都咪話唔牙煙。
射手查理柯士甸着火

反觀QPR近5仗贏3場，只係輸過畀英冠冠軍李斯特城，表現穩定。雖然中場贊拿斯、艾真度科連養傷，不過翼鋒凱列特、中場祖爾巴頓、中堅李察鄧尼等一班前英超兵隨時候命，牌面的確佔優。

加上首席射手查理柯士甸最近着晒火，連續3仗建功，勁有決心帶領球隊重上英超。咪忘記佢哋今季兩戰韋根不敗之餘仲零封對手，就知執教經驗豐富嘅領隊夏利列納係有一手，佢哋想喺今仗全身而退應該唔難。