煞科日天國與地獄 護級求存三個只能活一個

猪拉多纳

榜末三弱漢堡、紐倫堡同布倫瑞克背水一戰，其中兩隊將要直接降班，只有取得第16名（尾三）至可以參加護級附加賽，上季賀芬咸去到最後時刻攞到附加賽參賽權，贏多蒙特過程精彩絕倫，今晚形勢一樣緊張刺激。

漢堡目前以27分排尾三，一分壓住紐倫堡，兩分壓住布倫瑞克，但唔能夠畀任何一隊過頭，今晚作客對緬恩斯和波都唔穩陣，基於主力射手拉蘇加傷愈復出，配合雲達華治、查漢奴古同伊利斯域合作攻堅，面對仍然要搶分爭踢歐霸嘅緬恩斯，預期都係入球騷。
史浩克炒得起紐倫堡

漢堡兩支護級對手紐倫堡同布倫瑞克實力同近況更差，前者已經六連敗，後者亦四連敗兼且一球都入唔到，兩軍今仗分別作客對史浩克同賀芬咸，搶分機會都唔樂觀，尤其紐倫堡防線殘到震，精神領袖門將舒希化因傷缺陣，三大後衞賓路拿、贊特拿同柏頓赫特齊齊坐波監，主隊史浩克雖然都有箭頭亨特拉爾同中堅菲臘比辛坦拿停賽，但陣容依然完整得多，防線殘晒嘅紐倫堡仲要焗攻，史浩克大可靠反擊瘋狂入波。

（有線64及203台周六晚9時30分直播）
拜仁新舊雙箭爭神射手

此外，拜仁主場對史特加（有線63台周六晚9時30分直播），多蒙特作客鬥哈化柏林，表面係例行公事，但對於拜仁文迪蘇傑同多蒙特羅拔利雲度夫斯基嚟講就關係重大，因為經過33輪德甲後，兩位前鋒目前同以18個入球並列射手榜首，羅拔利雲度夫斯基下季將過檔拜仁同文迪蘇傑爭位踢，今晚兩人又點肯射輸畀對手？