利雲特華倫鬥踢守「細」波

猪拉多纳

今晚西甲利雲特主場迎戰華倫西亞，嚟到季尾賽事出現唔少意外賽果，利雲特上周爆大冷主場2:0擊敗馬體會，另一邊廂華倫作客亦賽和皇馬2:2，證明季尾波冇路捉。今晚兩隊半斤八両，勝負難料，但利雲特主場幾守得，華倫作客鋒力又唔係強，1.85倍入球細有力開出。

（開賽時間︰周日凌晨4:00）
利雲特守強攻弱

利雲特一向係支守優於攻嘅球隊，唔好睇佢哋聯賽排第10，其實佢哋入球能力認真麻麻，聯賽去到36周，平均每場都入唔到一球。不過後防有桑法蘭同大衞拿華路兩個老波骨睇住，防線效率唔錯，特別喺主場出擊，有睇上星期擊敗馬體會嘅朋友，相信會略知一二，對住實力高少少嘅華倫，踢守勢波在所難免。

作客嘅華倫下半季演出有大幅度改善，可惜仍未足以拎到歐洲賽入場券，隊波士氣唔算太好。今晚冇乜好爭作戰心態成疑，仲要作客防守唔錯嘅利雲特，要入波有一定難度喎，呢場「巴倫西亞打吡」隨時係悶戰一場！