利物浦機會渺茫 拆紐補番數

猪拉多纳

上兩個星期利物浦同利迷都好似喺地獄行咗兩轉咁，繼隊長謝拉特對車路士出現「世紀跣腳」輸波後，上周對住水晶宮又經歷死亡9分鐘，喺9分鐘內畀對手逼和3比3，要奪冠基本上只係空談，今晚主場謝幕戰對紐卡素，科娜深信紅軍跌得愈重，反彈得愈高，今場更有中場主力佐敦軒達臣刑滿復出，讓球主勝值得支持。

（now 622周日晚10時直播）
冇壓力踢得更放

利物浦上場作客水晶宮貪勝不知輸，為咗拉近同曼城嘅得失球差，掛住進攻而返唔切去防守，最尾畀人追番3球，痛失兩分。愈痛先愈會成長，一班紅軍球員經過呢場波後應該知道要保持攻守平衡，呢場收咧戰唔止要喺主場以勝利獻畀忠心球迷，亦要減少失球。

依家紅軍想奪冠要等奇迹，但咁反而能令球員放開嚟踢，當初紅軍球員見到冠軍離佢哋好近嘅時候，口裏雖然話冇壓力，但場上表現已經出賣咗佢哋，結果一場比一場踢得差，終於喺水晶宮一仗同對手打和，蘇亞雷斯嘅爆喊更見到佢想贏冠軍嘅壓力有幾大，先會失控崩潰。利物浦喺冇乜壓力下可能會踢得仲好，而且今場更有佐敦軒達臣刑滿復出，紅軍冇咗佢嘅3場波錄得勝和負各一，贏諾域治嗰場亦係贏得驚險，冇咗軒達臣嘅全場跑動，紅軍中場控制力即刻大減，進攻亦冇咁流暢，佢嘅復出對球隊攻守都有幫助。
紐卡素作客曳爆

紐卡素季尾成績暴跌之餘，球迷鬧爆班主艾殊利同領隊柏杜之聲不絕於耳，上場大勝卡迪夫城皆因對手太曳，今場作客利物浦嘅地獄主場，作客已經錄得4連敗嘅紐卡素仍冇勝算可言，紅軍應可淨勝兩球或以上，捧讓球主勝。