尹戈爾Out晒不宜做魔王

猪拉多纳

回顧今季英超，衞冕嘅曼聯於莫耶斯帶領下，淪為爭歐霸入場券分子令人失望，再次證明一名領隊嘅重要性。盛傳荷蘭國家隊主帥尹戈爾快將入主紅魔，雖然95年佢率領一眾阿積士生牯仔稱霸歐洲，並於巴塞同拜仁創造過佳績，不過呢位教頭脾氣古怪，經常同大牌球星鬧不和，無論採用343、433或4231陣式，都太過偏重進攻，而佢亦會帶埋古華特等「自己友」作為教練團班底，甚至有傳會委任同胞尹佩斯做隊長，可能會同朗尼、卡域克等老臣子爆發派系鬥爭，內部立立亂點會取得好成績。若果因貴價合約而唔敢炒佢又係嘥時間，環顧現時歐洲球壇，只有多蒙特嘅高普及馬體會嘅施蒙尼夠料教紅魔，Peter認為尹戈爾已經過氣。

講番今晚英超煞科，利物浦嘅爭標機會只得兩個──渺茫同冇機會，雖然紅軍今季大躍進可謂超額完成，但如果粉絲以此為藉口自我安慰的話，實在太傻太天真。事實上紅軍能殺上爭冠行列，與曼城、車路士、曼聯等經歷易帥陣痛不無關係，良機一失下年未必再來。首先下季要兼顧歐聯戰線，二來防線甩漏太多，全季失球數字恐怖，若非弗到爆嘅蘇亞雷斯喺前線單天保至尊，紅軍早就爭冠無望，亦反映出領隊羅渣士重攻輕守嘅思維，仍未達到頂級主帥級數，因此Peter勸喻利粉對愛隊下季前景不宜太樂觀。
金句：紅魔選帥！唔好揀佢！