打比郡士氣盛主場添食

猪拉多纳

各位球迷若然睇完英超煞科戰覺得意猶未盡，不妨睇埋英冠升班附加賽次回合，睇吓究竟邊隊有機會取得來季升上英超資格，科娜就覺得打比郡係大熱，呢隊波雖然星味不及昆士柏流浪，不過勝在夠團結，踢法又好睇，首回合作客反勝防守不俗嘅白禮頓更證明班波唔嘢小，今場次回合返到主場，撐佢哋贏波晉級決賽！（TVB 302周一凌晨零時15分直播）

打比郡上場作客白禮頓於上半場18分鐘先失1球，不過班球員並未有自亂陣腳，先由前鋒基斯馬田喺10分鐘後射入12碼逼和，跟住呢位贏波功臣喺上半場補時階段一腳禁區頂勁射撞楣， 個波彈到對手門將古斯錫背脊再彈入網，用咗半場就成功反勝，嚟到下半場就到門將李爾格蘭發威，打比郡靠佢力挽狂瀾先至能保住2比1勝局，晉級形勢大好，球員士氣大振。

打比郡領隊係臭名遠播嘅麥卡倫，呢位前英格蘭國家隊領隊雖然自從搞到英軍出席唔到08年歐國盃決賽周後成為過街老鼠，不過佢教低級球隊唔係冇料嘅，自從佢喺9月尾接手打比郡後，球隊成績就穩步上揚，曾經喺11至12月創出7連勝佳績，嚟到季尾又試過5連勝，佢令打比郡變成一支進攻力強嘅球隊，主場威力亦勁，嚟到次回合雖然領先緊2比1，打比郡都唔會放軟手腳，實行keep住個勢殺入決賽！
白禮頓焗攻欠板斧

防守係白禮頓最厲害嘅武器，但上場畀打比郡輕易反勝，今場作客要佢哋主攻真係有啲吃力，曼聯借將連格係球隊進攻主力，但佢一旦畀對手封死，白禮頓就苦無對策，進攻冇乜板斧，只可以靠遠射，睇下有冇神來之筆射死對方，可以睇到白禮頓今場作客都係凶多吉少，捧主勝！