德國鬥波試邊緣腳

猪拉多纳

德甲煞科冇耐，德國隊今晚喺主場即約波蘭拍跳，備戰巴西世盃。雖然多名効力拜仁、多蒙特、阿仙奴等嘅德國國腳未歸隊，但領隊勒夫特別揀咗18人入伍，乘機試陣，當中包括禾蘭、麥斯美亞、安達夏恩等新仔為趕搭世盃尾班車，仲唔趁住今仗喺勒帥面前騷哥利博上位咩。

（now 633及635周三凌晨2時45分直播）
賀芬咸射手禾蘭最Sharp醒

由於嚟緊周日凌晨拜仁將喺德國盃決賽硬撼多蒙特，同日阿仙奴亦要爭足總盃，加埋漢堡今周要進行兩回合護級附加賽生死戰，因此呢四隊嘅德國國腳今仗全部免役。拜仁同多蒙特球員佔咗德軍半壁江山，勒夫惟有另選18人去應付此役，，其中禾蘭今季喺聯賽攻入11粒勁Sharp醒，而佢同老將高路斯係30人大軍中，碩果僅存嘅兩名前鋒，可見呢位賀芬咸射手備受重視。