做得球迷就要輸得起

猪拉多纳

「百貨應百客」，每樣嘢都一定會有人鍾意，有人唔鍾意o架啦。球隊亦都一樣，每支球隊都總會有班死忠，又會有班對佢哋恨之入骨嘅球迷，但我就覺得敵對球迷唔一定要爭崩頭、打餐死嘅！中國文化教我哋「勝固欣然，敗亦可喜」，要有「仁者的胸襟」同「運動家的風度」。
學識欣賞死對頭

Yennie覺得每隊波都有值得學習同欣賞嘅地方，真係唔明點解咁多球迷淨係盲目追隨自己支愛隊，同時就要踩到人哋嘅「飛佛」一文不值先至安樂！

就以我自己為例，我熱愛本地波，支持港甲，就算我係「擁南躉」，但同樣都會欣賞佢哋嘅死對頭傑志同太陽飛馬，甚至乎會入場支持佢哋。可能有人就會話咁樣咪唔係忠心嘅「南華躉」囉，但我就覺得視乎你點樣去睇「運動」依樣嘢！

我自己就比較重視比賽過程，例如會欣賞球員嘅走位、組織等等，如果兩隊波都搏晒老命，就算場波係互交白卷都可以好好睇。
最討厭言語侮辱敵對Fans

有好多球迷會侮辱死對頭球隊同Fans，例如用「獌」、「猁」、「鏝」嚟鬧人，我就好討厭依啲球迷嘅所作所為嘞！人哋贏波、奪標，就唔抵得，睇唔過眼，而要用言語去侮辱人哋，但求發洩自己嘅不滿，一句講晒係「輸唔起」！比賽一定有贏有輸，冠軍只有一個。贏唔贏到唔係最緊要，最重要嘅係輸得起，做人同睇波一樣道理！