賓菲加蓄銳一擊

猪拉多纳

今晚歐霸盃決賽由西甲球隊西維爾同葡超球隊賓菲加喺意大利都靈嘅祖雲達斯球場交鋒，細鬼之前兩場歐霸盃4強賽都有睇晒，感覺上賓菲加嘅實力係喺西維爾之上，所以今晚較睇好賓菲加可以贏波捧盃。
上仗聯賽對波圖玩留力

賓菲加喺歐霸盃4強淘汰剛贏得意甲冠軍嘅祖雲達斯殺入決賽，細鬼喺兩回合睇到嘅係呢支葡超冠軍踢法係非常之爽，而且進攻瓣數好多，令人睇到目不暇給。賓菲加為準備呢場歐霸盃決賽，喺上仗聯賽對波圖大玩留力，一眾前線主力如洛迪高摩蘭奴、洛迪高利馬及奧斯華度加坦等全部缺陣，擺明養精蓄銳踢呢場決戰，細鬼好有信心佢哋今晚可以交出好成績。

西維爾能夠殺入歐霸盃決賽，唔多唔少都係獲幸運之神眷顧，球隊喺歐霸盃4強首回合領先同國球隊華倫西亞2球，但次回合竟一度落後0比3，全靠中場麥比亞補時入波追成1比3，藉作客入球優惠殺入決賽，表現唔係太有說服力。細鬼認為賓菲加實力的確喺西維爾之上，加上佢哋能夠兩回合贏到祖雲達斯入決賽，點都好過只係靠作客入球優惠過關嘅西維爾，細鬼今晚一定撐賓菲加。