葡超上位成投X新貴

猪拉多纳

本季英超上周日終於收鑼，貴為全球最受關注的聯賽，今季賽事無論由爭標抑或到護級，競爭都非常激烈，特別係擁有眾多擁躉嘅「紅軍」利物浦今季演出可人，大打進攻足球之餘更一度取得奪冠主導權，同兩大豪門曼城及車路士鬥到最後階段，過程可以話絕對引人入勝。除咗幾大名牌球隊，甚至連以往嘅二線波愛華頓、修咸頓等都有驚喜演出，掀起唔少話題，亦提升球迷投X英超比賽嘅意欲，帶挈今季英超投X額比上季更多，冠絕歐洲各大聯賽。英超競爭愈嚟愈精采，唔止令球迷大飽眼福，亦係菠菜界嘅喜訊。
西甲應加強推廣吸客

西甲投X額緊隨英超之後，其實今季西甲亦非常緊湊，比賽水準高，但問題係球迷始終只將注意力集中喺皇家馬德里及巴塞隆拿身上，極其量識多支今季異軍突起嘅馬德里體育會，對其他球隊認識唔多，亦係西甲投X額唔及英超嘅主要原因。即使係打入歐霸盃決賽嘅西維爾，平時都唔係太吸客，如果想提高聯賽嘅知名度，西甲賽會有必要加強推廣，爭奪多啲亞洲觀眾市場。

事實上，今晚歐霸盃決賽由西維爾對賓菲加，普遍莊家比較睇好「里斯本雄鷹」賓菲加。西維爾近況其實唔講得好好，上圈晉級過程好驚險，今場受讓都冇着數。而葡超水準愈嚟愈高，甚至喺歐洲聯賽嘅排名即將超越意甲，成為歐洲第4大聯賽，睇番賓菲加4強淘汰意甲班霸祖雲達斯，證明葡超水準嘅提升，相信未來日子，葡超會成為投X者新戰場。賓菲加應可乘勢攞埋今屆冠軍，小讓平半，上盤可取。